1445. Juli 20. Strzelce Opolskie

In gotis namen Amen. Czu ewigem gedechtnisse. Wir Bernhard von gotis gnoden Herczog vnd herre czu Oppol vnd Falkenberg etc. Bekennen vffintlichen mit desem briefe allen die en sehn, horen adir lesen, das vor vns komen ist der woltuchtige Sczepan Dobieschowsky wolgesundt leibis vnd der vornumft, vmbetwungen nach vorleitit, Sundir mit vorgehabtem rate seiner frunde, vnd reichte vff recht vnd redlichen yn seinem vnd seiner Swestere namen Dem woltuchtigen Janken von Zackraw, seinen geerben, elichen nochkomen vnd nehsten, aliis das, das sie an Erbe vnd Gutte doselbist czu Zackraw yn vnserm Strelitczischen gebitte gelegen gehabt haben vnd worczu sie Recht gehabt haben, vnd aliis das dorumb sie en yn czusprechen gehabt haben, yn eynem Rechten kawffe vor Czwenczig marke groschen Behmischer montcze Polnischer czal, mit allen vnd iczlichen Iren czugehorungen vnd genissen wie die mit sundirlichen namen benant svnt adir mochten benant werden, gleich samp iczlichs alhie mit sundirlichen namen benant stunde, vil adir wenig vnd also breit, weit vnd lang vnd mit alle Rechten, als sie das selbist gehabt, gehalden vnd besessen haben, nichtis obiral ausgenomen, das aliis als genant ist czu haben, halden vnd des genissen, domete czuthuen vnd czulossen, vorkewfen, vorsetczen, vorwechseln, vorgeben, empfremden, erplichen vnd ewiglichen czu besitzen vnd an seine, seiner geerben, elichen nochkomen vnd nehsten nutcz vnd fromen czuwenden, wie sie das am allirbesten dunken wirt vnd czu rate werden, Idach vnschedlich vnserm furstlichen dienste. Mit orkunde desis briefis bestetigit, vorsegelt vnd ingeweist mit vnserm furstlichen angehangenden Ingesegel. Geschen vnd Gegeben czu Strelitcz am Dinstage noch Sinte Alexii tage Nach Cristi geborth fierczenhundert Jar, dornoch ym fumffvndfierczigsten Jare. Dobey seynt gewest die woltuchtigen vnsere lieben getrawen Micolay Zwoysky vnsir marschalk, Henrich Crenzkowsky hewptman czu Strelitcz, Petir Zwoysky, Franczke von Elgoth, Micolaike von der Beraw vnd herre Johannes Gromko pfarrer czu Strelitcz, der dese vorreichunge geczeichent hat, vnd wir donoch Bartholomeo probiste czu Falkenberg vnserm Schreibir desen brieff czu schreiben befolen haben.

Mit anhangendem Siegel in rothem Wachs, wie in der vorhergehenden Urkunde, aber an einem Pergamentstreifen.

Codex Diplomaticus Silesiae, hrsg vom Vereine für Geschichte und Alterthum Schlesiens, Bd 1, Urkunden des Klosters Czarnowanz. Hrsg von dr W. Wattenbach, Breslau 1857.